भारत चीनबीच तनावबीच दुई देशका सैनिकबीच पुनः एकपटक झडप भएको छ । भारतीय सेनाले २० जनवरीमा सिक्किमका दुई देशबीच आमने सामने भएको पुष्टि गरेका छन् । दुई सेनाका कमान्डरले निश्चित प्रोटोकलअनुसार विवाद सुल्झाइसकेको भारतीय सञ्चार माध्यमले जानकारी दिएको छ । भारतीय मिडियाका अनुसार चीनले एक्चुअल लाइन अफ कन्ट्रोल (एलएसी) मा घुसपैठ गर्ने कोसिस गरेको थियो । भारतीय जवानले रोक्दा चिनियाँ सैनिकले हातपात गर्न सुरु गरेको भारतीय समाचार माध्यमले जानकारी दिएको छ ।

झडपमा चीनका २० सैनिक घाइते भएका छन् । भारतका चार जवान पनि घायते भएका छन् । यद्यपि, भारतीय सेनाले घाइतेको कुनै जानकारी भने दिएको छैन । यो तनाव कम गर्नका लागि पूर्वी लद्दाखको मोल्डोमा भारत र चीनका सैन्य अधिकारीबीच आइतबार ९ औं चरणको कुराकानी भयो । करिब १५ घण्टासम्म चलेको यो बैठकको निष्कर्ष हालसम्म सार्वजनिक भइसकेको छैन । तर भारतले एलएसीमा तनाव कम गर्न अपिल भने गरेको छ ।