विद्यालयमै मैनबत्ती उत्पादन गरेर राम्रो आम्दानी

बैतडी– पाटन नगरपालिका–९ हुक्केडाँडास्थित सिद्धेश्वर माध्यमिक विद्यालयका विद्यार्थीले विद्यालयमै उत्पादन गरेको मैनबत्ती बिक्रीवाट ७० हजार आम्दानी गरेको हो। कक्षा ६ देखि ८ सम्म पठनपाठन हुने पेशा व्यवसाय र प्रविधि शिक्षा पाठ्यक्रमअन्तर्गत प्रयोगात्मक कक्षामा विद्यार्थीहरुले मैनबत्ती उत्पादन गरेका हुन्। विद्यार्थीहरुको क्षमता अभिवृद्धि र विद्यालयको आयस्रोत बढाउनका लागि मैनबत्ती उत्पादन गरिएको विद्यालय व्यवस्थापन समितिका अध्यक्ष प्रेमसिंह भाटले जानकारी दिए। विद्यालयमा उत्पादित मैनबत्ती तिहारको समयमा स्थानीय बजार खोडपे, पाटन, पुर्चौडी, गाँजरीलगायतका बजारमा बिक्री गरिएका अध्यक्ष भाटले बताए। विद्यार्थीले उत्पादित एक हजार ८५० प्याकेट बिक्री गरिएको विद्यालयले जनाएको छ। एक प्याकेटको १५ रुपैयाँदेखि ७० रुपैंयाँसम्म बिक्री भएको थियो। विद्यालयले गत वर्ष पनि ५२ हजारका मैनबत्ती उत्पादन गरी बिक्री गरेको थियो।
निजी स्रोतबाट पारिश्रमिक लिएर काम गर्ने शिक्षकहरुलाई तलब दिन अप्ठ्यारो भएको र विद्यार्थीहरुले उत्पादन गरेको मैनबत्ती बिक्री गरी आएको रकमबाट निजी शिक्षकहरुलाई तलब भत्ता दिन सहयोग पुग्ने विद्यालयले जनाएको छ। अविभावककै लगानीमा विभिन्न शैक्षिक समग्री र बालउद्यान समेत रहेको उक्त विद्यालय जिल्लाकै पहिलो कागजरहित विद्यालयका रुपमा समेत परिचित छ। २०१८ सालमा स्थापना भएको उक्त विद्यालयमा हाल ३०० बढी विद्यार्थी अध्ययनरत रहेका छन्।

LEAVE A REPLY

Please enter your comment!
Please enter your name here